اختلاف کی بنیاد پر بازو گلی میں مسجد کی تعمیر

  شہر کے ارباب حل وعقد توجہ فرمائیں

✍️ مفتی محمد عامر عثمانی ملی 

     (امام وخطیب مسجد کوہ نور )

قارئین کرام ! شہر عزیز مالیگاؤں دور دور تک مسجدوں میناروں کے شہر سے مشہور ومعروف ہے، لیکن اس کا یہ مطلب نہیں ہے کہ اب ہم بلاضرورت مسجدیں تعمیر کرتے چلے جائیں۔ ابھی چند دن پہلے مجھے ایک فون آیا کہ فلاں محلے میں ایک مسجد تعمیر کرنے کے لیے جگہ خریدنا ہے اس کے لیے آپ کی کوہ نور مسجد میں جمعہ میں چندہ کرنے کے لیے وقت چاہیے، میں نے ان سے کہا کہ وہاں تو فلاں مسجد تو کافی کشادہ ہے اور اب اس کے بازو گلی میں ہی مسجد تعمیر کرنے کی ضرورت کیوں پیش آگئی، تو انہوں نے کہا کہ وہاں کے جو ذمہ دار ہیں وہ اپنی چلاتے ہیں اور وہاں مکتب نہیں ہے اور جماعت کا کام نہیں کرنے دیا جاتا۔ میں ان سے کہا کہ اس کا یہ حل نہیں ہے کہ اس کے بازو گلی میں دوسری مسجد ہی تعمیر کرلی جائے، اس کا کوئی دوسرا حل تلاش کیا جاسکتا ہے جو ذمہ دار اپنی چلاتے ہیں اہلیان محلہ ان سے باز پرس کریں اور شہر کے اکابر مفتیان کرام کے مشورہ سے مسئلہ حل کریں۔ لیکن انہوں نے اس کا کوئی معقول جواب نہیں دیا اور بات ختم ہوگئی۔

آپ حضرات کو معلوم ہونا چاہیے کہ شہر کے ایک مشہور محلہ میں ایک بہت بڑی اور کشادہ مسجد جس کی تعمیر جدید کا کام غالباً اب بھی جاری ہے جس کے کئی مرتبہ طعام تعاون کے پروگرام ہوچکے ہیں، دور دور کے محلے میں نوجوانوں کے ذریعے عمومی چندہ ہوا ہے۔ اب اس کے بازو گلی میں ایک دوسری مسجد تعمیر ہونے جارہی ہے جس کی میں سمجھتا ہوں کوئی شرعی ضرورت نہیں ہے۔

دیگر ذرائع سے مزید معلومات لینے سے یہ علم ہوا کہ اس مسجد کی تعمیر کی اصل بنیاد تبلیغی جماعت کا اختلاف ہے، کیونکہ پرانی مسجد میں ایک دھڑے کا کام ہوتا ہے، دوسرے دھڑے کو غالباً کام کرنے کی اجازت نہیں ہے، لیکن یہ کوئی پہلی مسجد نہیں ہے، شہر کی ایسی پچاسوں مساجد ہیں جہاں صرف ایک دھڑے کا کام ہوتا ہے۔ لیکن ایسا نہیں ہے کہ وہاں دوسرے دھڑے کے لوگ نہیں ہیں، وہ بھی ہیں، لیکن انتشار کی وجہ سے وہ لوگ دوسری مساجد کے اعمال میں شریک ہوجاتے ہیں۔ ہر کوئی جماعت کا کام کرنے کے لیے پرانی مسجد کے پیچھے ایک نئی مسجد تعمیر نہیں کرواتا۔ لیکن اس دوسرے دھڑے نے بازو گلی میں چھوٹی سی جگہ یعنی تقریباً سات آٹھ سو اسکوائر فٹ زمین کی خریدی کے نام پر شہر بھر میں چندہ جمع کرنا شروع کردیا جس کی قیمت نصف کروڑ تک جانے والی ہے پھر اس کی تعمیر میں اتنی ہی رقم لگنے والی ہے۔

میری شہر کی سنجیدہ عوام، دیندار طبقہ اور علماء کرام سے سوال ہے کہ ایک معمولی سے کام کی وجہ سے امت کا لاکھوں روپیہ لگانا درست ہے؟ اگر درست نہیں ہے تو اس پر روک لگانے کی ضرورت ہے یا نہیں؟ اگر خدانخواستہ اس غلط رجحان کو تقویت مل گئی تو تبلیغی جماعت کے اختلاف کی بنیاد پر ایک مسجد کے پیچھے دوسری مسجد کی تعمیر کے نام پر مخیران کو حیران پریشان کیا جائے گا۔ میرا کام اس سلسلے میں آپ حضرات کی توجہ دلانا تھا، میں نے اپنا کام کردیا ہے، امید ہے کہ اس کا کوئی شرعی اور معقول حل نکالا جائے گا۔

اس سلسلے میں کمنٹ باکس میں اپنی رائے ضرور دیں۔

اللہ تعالیٰ ہم سب کو ضرورت کی جگہوں پر خرچ کرنے کی توفیق عطا فرمائے۔ آمین