عشرہ ذی الحجہ اور عرفہ کے روزے کی فضیلت

سوال :

مفتی صاحب! ذی الحجہ کے روزوں کی کیا فضیلت ہے، اسی طرح صرف یوم العرفہ کے روزے کی کوئی خاص فضیلت ہے؟ براہ کرم رہنمائی فرمائیں۔
(المستفتی : ڈاکٹر فراز، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : ذوالحجہ کا پہلا عشرہ بڑی فضیلت کا حامل ہے۔ ان ایام میں نیک اعمال کرنے کی ترغیب دی گئی ہے اور ان دنوں میں کی گئی ہر قسم کی عبادت کا اجر وثواب دیگر ایام کی بہ نسبت بڑھ جاتا ہے، خواہ یہ عبادات ذکر و اذکار کی صورت میں ہوں، یا نماز اور روزوں کی صورت میں ہوں۔ اس سلسلے میں جو احادیث ملتی ہیں انہیں ذیل میں ذکر کیا جاتا ہے۔

حضرت ابن عباس رضی اللہ تعالیٰ عنہما سے روایت ہے کہ رسول اللہ صلی اللہ علیہ وسلم نے فرمایا : ذوالحجہ کے پہلے دس دنوں میں کیے گئے اعمالِ صالحہ اللہ تعالیٰ کے نزدیک تمام ایام میں کیے گئے نیک اعمال سے زیادہ محبوب ہیں۔ صحابہ رضی اللہ تعالیٰ عنہم نے عرض کیا : یا رسول اللہ ﷺ! اگر ان دس دنوں کے علاوہ اللہ کی راہ میں جہاد کرے تب بھی؟ آپ ﷺنے فرمایا: ہاں! تب بھی اِن ہی اَیام کا عمل زیادہ محبوب ہے، البتہ اگر کوئی شخص اپنی جان و مال دونوں چیزیں لے کر جہاد میں نکلا اور ان میں سے کسی چیز کے ساتھ بھی واپس نہ ہوا (یعنی شہید ہوگیا تو یہ افضل ہے)۔ (١)

حضرت ابوہریرہ رضی اللہ تعالیٰ عنہ سے روایت ہے کہ نبی کریم صلی اللہ علیہ وسلم نے فرمایا : اللہ کے نزدیک ذوالحجہ کے پہلے دس دنوں کی عبادت تمام دنوں کی عبادت سے زیادہ پسندیدہ ہے۔ ان ایام میں سے (یعنی ذوالحجہ کے پہلے دس دنوں میں) ایک دن کا روزہ پورے سال کے روزوں اور رات کا قیام شب قدر کے قیام کے برابر ہے۔ (٢)

حضرت ابوقتادہ رضی اللہ تعالیٰ عنہ سے روایت ہے کہ نبی کریم صلی اللہ علیہ وسلم نے فرمایا : مجھے اللہ تعالیٰ سے امید ہے کہ عرفہ کے دن کا روزہ رکھنے سے ایک سال پہلے اور ایک سال بعد کے گناہ معاف فرما دے۔ (٣)

ذکر کردہ احادیثِ مبارکہ سے معلوم ہوا کہ ذوالحجہ کے پہلے آٹھ دنوں میں سے ہر دن کا روزہ ایک سال کے روزوں کے برابر اجر رکھتا ہے، اور یومِ عرفہ (9 ذوالحجہ) کے روزہ ایک سال قبل اور ایک سال بعد یعنی دو سالوں کے گناہوں کا کفارہ ہے۔

١) عَنْ ابْنِ عَبَّاسٍ قَالَ قَالَ رَسُولُ اللَّهِ صَلَّی اللَّهُ عَلَيْهِ وَسَلَّمَ مَا مِنْ أَيَّامٍ الْعَمَلُ الصَّالِحُ فِيهِنَّ أَحَبُّ إِلَی اللَّهِ مِنْ هَذِهِ الْأَيَّامِ الْعَشْرِ فَقَالُوا يَا رَسُولَ اللَّهِ وَلَا الْجِهَادُ فِي سَبِيلِ اللَّهِ فَقَالَ رَسُولُ اللَّهِ صَلَّی اللَّهُ عَلَيْهِ وَسَلَّمَ وَلَا الْجِهَادُ فِي سَبِيلِ اللَّهِ إِلَّا رَجُلٌ خَرَجَ بِنَفْسِهِ وَمَالِهِ فَلَمْ يَرْجِعْ مِنْ ذَلِکَ بِشَيْئٍ۔ (سنن الترمذی، رقم : ٧٥٧)

٢) عَنْ أَبِي هُرَيْرَةَ عَنْ النَّبِيِّ صَلَّی اللَّهُ عَلَيْهِ وَسَلَّمَ قَالَ: مَا مِنْ أَيَّامٍ أَحَبُّ إِلَی اللَّهِ أَنْ يُتَعَبَّدَ لَهُ فِيهَا مِنْ عَشْرِ ذِي الْحِجَّةِ يَعْدِلُ صِيَامُ کُلِّ يَوْمٍ مِنْهَا بِصِيَامِ سَنَةٍ وَقِيَامُ کُلِّ لَيْلَةٍ مِنْهَا بِقِيَامِ لَيْلَةِ الْقَدْر۔ (سنن الترمذی، رقم : ٧٥٨)

٣) عَنْ أَبِي قَتَادَةَ أَنَّ النَّبِيَّ صَلَّی اللَّهُ عَلَيْهِ وَسَلَّمَ قَالَ: صِيَامُ يَوْمِ عَرَفَةَ إِنِّي أَحْتَسِبُ عَلَی اللَّهِ أَنْ يُکَفِّرَ السَّنَةَ الَّتِي قَبْلَهُ وَالسَّنَةَ الَّتِي بَعْدَهُ۔ (سنن الترمذی، رقم : ٧٤٩)فقط
واللہ تعالٰی اعلم
محمد عامر عثمانی ملی
29 ذی القعدہ 1443

چوہے اور گھونس کو کس طرح مارا جائے؟

سوال :

مفتی صاحب ! چوہا، گُھونس وغیرہ مارنا کیسا ہے؟ کچھ لوگ گرم پانی (کھولتا ہوا) ڈال کر مارتے ہیں تو کچھ لوگ پتھر سے مارتے ہیں کچھ لوگ ایسے ہی چھوڑ دیتے ہیں جسکی وجہ سے وہ دوبارہ گھروں میں آجاتے ہیں ایسا کرنا کیسا ہے؟
(المستفتی : محمد حاشر، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : چوہے اور گھونس کے ضرر سے بچنے کی ان کو مارنے کے علاوہ اور کوئی صورت باقی نہ ہو مثلا ًجنگل وغیرہ میں لیجانے یا کسی جگہ چھوڑنے سے بھی ان کی ایذا سے بچنا ممکن نہ ہوتو انہیں اس طرح مارا جائے کہ ان کی جان فوراً نکل جائے، وہ تڑپ تڑپ کر نہ مریں، مثلاً انہیں گولی بھی مار دی جائے یا کسی نوکدار ہتھیار یا پتھر سے انہیں کم سے کم وار میں قتل کردیا جائے، اسی طرح انہیں تیز زہر وغیرہ بھی دیا جاسکتا ہے جس سے ان کی جان آسانی کے ساتھ نکل جائے اور جان نکلنے میں زیادہ تکلیف نہ ہو۔ ان پر گرم پانی ڈالنا چونکہ جلانے کی قبیل سے ہے، اور اس میں فوراً جان نہیں نکلے گی، لہٰذا اس طرح انہیں مارنے سے بچنا چاہیے۔

يَجُوزُ (فَصْدُ الْبَهَائِمِ وَكَيُّهَا وَكُلُّ عِلَاجٍ فِيهِ مَنْفَعَةٌ لَهَا وَجَازَ قَتْلُ مَا يَضُرُّ مِنْهَا كَكَلْبٍ عَقُورٍ وَهِرَّةٍ) تَضُرُّ (وَيَذْبَحُهَا) أَيْ الْهِرَّةَ (ذَبْحًا) وَلَا يَضُرُّ بِهَا لِأَنَّهُ لَا يُفِيدُ، وَلَا يُحْرِقُهَا۔ (الدر المختار، ٦/٧٥٢)

الْهِرَّةُ إذَا كَانَتْ مُؤْذِيَةً لَا تُضْرَبُ وَلَا تُعْرَكُ أُذُنُهَا بَلْ تُذْبَحُ بِسِكِّينٍ حَادٍّ كَذَا فِي الْوَجِيزِ لِلْكَرْدَرِيِّ۔ (الفتاوى الهندية، ٥/٣٦١)فقط
واللہ تعالٰی اعلم
محمد عامر عثمانی ملی
28 ذی القعدہ 1443

جرسی جانور کی قربانی کا حکم

سوال :

کیا فرماتے ہیں علماء دین ومفتیان شرع متین درمیان مسئلہ ھذا کے کہ جرسی جانور کا گوشت کھانا اور اس کی قربانی کرنا کیسا ہے؟ بہت سے لوگ منع کرتے ہیں، آپ شرعی دلائل کی روشنی میں مسئلہ واضح فرمائیں۔
(المستفتی : حافظ حسان، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : جانوروں سے متعلق فقہاء کے یہاں ایک قاعدہ ہے کہ "الولد یتبع الام" یعنی بچہ ماں کے تابع ہوتا ہے، جوحکم ماں کا ہوگا وہی بچہ کا بھی ہوگا، مثلاً بکری کے رحم میں کسی دوسرے جانور کا نطفہ بذریعہ انجکشن پہنچایا جاتا ہے اور اس سے بچے کی ولادت ہوتی ہے، تو اُسے بکری کا بچہ ہی کہا جائے گا، اور اسکا دودھ پینا اور گوشت کھانا حلال ہوگا۔

جرسی گائے میں چونکہ بیل کا نطفہ بذریعہ انجکشن گائے کے رحم میں پہنچایا جاتا ہے اور اس سے بچے کی ولادت ہوتی ہے۔ لہٰذا اُسے گائے کا بچہ ہی کہا جائے گا، اور جب اسے گائے کا بچہ ہی کہا جائے گا تو اس کی قربانی بھی درست ہوگی۔ البتہ قربانی چونکہ ایک عظیم عبادت ہے۔ اور اس کے لیے جب غیر مشتبہ جانور بآسانی دستیاب ہوسکتے ہوں، تو اس قسم کے مشتبہ جانور کی قربانی سے بچنا بہتر ہوگا۔

لِأَنَّ الْمُعْتَبَرَ فِي الْحِلِّ وَالْحُرْمَةِ الْأُمُّ فِيمَا تَوَلَّدَ مِنْ مَأْكُولٍ وَغَيْرِ مَأْكُولٍ۔ (شامی : ٣٠٥)

وَلَا يَجُوزُ فِي الْأَضَاحِيّ شَيْءٌ مِنْ الْوَحْشِيِّ، فَإِنْ كَانَ مُتَوَلَّدًا مِنْ الْوَحْشِيِّ وَالْإِنْسِيِّ فَالْعِبْرَةُ لِلْأُمِّ، فَإِنْ كَانَتْ أَهْلِيَّةً تَجُوزُ وَإِلَّا فَلَا، حَتَّى لَوْ كَانَتْ الْبَقَرَةُ وَحْشِيَّةً وَالثَّوْرُ أَهْلِيًّا لَمْ تَجُزْ، وَقِيلَ: إذَا نَزَا ظَبْيٌ عَلَى شَاةٍ أَهْلِيَّةٍ، فَإِنْ وَلَدَتْ شَاةً تَجُوزُ التَّضْحِيَةُ، وَإِنْ وَلَدَتْ ظَبْيًا لَا تَجُوزُ۔ (الفتاویٰ الہندیۃ : ٥/٢٩٧)

لِيُعْلَمَ أَنَّ حُكْمَ الْوَلَدِ حُكْمُ أُمِّهِ فِي الْحِلِّ وَالْحُرْمَةِ دُونَ الْفَحْلِ.. فَلَوْ كَانَتْ أُمُّهُ حَلَالًا لَكَانَ هُوَ حَلَالًا أَيْضًا؛ لِأَنَّ حُكْمَ الْوَلَدِ حُكْمُ أُمِّهِ؛ لِأَنَّهُ مِنْهَا وَهُوَ كَبَعْضِهَا۔ (بدائع الصنائع : ٥/٣٨)فقط
واللہ تعالٰی اعلم
محمد عامر عثمانی ملی
26 ذی القعدہ 1443

اتی کرمن مخالف کارروائی متاثرین اور انتظامیہ سے چند گذارشات

اتی کرمن مخالف کارروائی
متاثرین اور انتظامیہ سے چند گذارشات

✍️ مفتی محمد عامرعثمانی ملی
   (امام و خطیب مسجد کوہ نور)

قارئین کرام! شہر میں اتی کرمن ہٹاؤ مہم شدت کے ساتھ ایک مرتبہ پھر جاری کردی گئی ہے۔ چنانچہ اسے دیکھتے ہوئے کچھ دل کی باتیں اتی کرمن کرنے والوں اور انتظامیہ سے اس مضمون کے توسط سے کرنا چاہتے ہیں، اور دعا کرتے ہیں کہ شاید کسی دل میں اتر جائے ہماری بات۔

محترم قارئین! متاثرین یعنی جن لوگوں نے سڑکوں پر اتی کرمن کر رکھا ہے ان تمام افراد سے مؤدبانہ مخلصانہ اور عاجزانہ درخواست ہے کہ آپ اس حقیقت کو بہرحال تسلیم کرلیں کہ اتی کرمن اور سڑکوں پر قبضہ کرلینا شرعاً ناجائز اور گناہ کی بات ہے۔ اور اگر اس سے راستہ چلنے والوں کو تکلیف ہورہی ہے تو اس پر دوسروں کو تکلیف پہنچانے کا گناہ الگ ہوگا۔ یعنی یہ کوئی معمولی بات نہیں ہے بلکہ اس عمل پر احادیث مبارکہ میں وعید وارد ہوئی ہے جن میں سے چند احادیث ملاحظہ فرمائیں۔

حضرت ابوہریرہ ؓ سے روایت ہے کہ رسول کریم صلی اللہ علیہ و سلم نے ارشاد فرمایا مسلمان وہ شخص ہے کہ جس کی زبان اور ہاتھ (کی ایذاء) سے مسلمان محفوظ رہیں اور مومن وہ ہے کہ جس سے لوگ اپنے جان و مال کا اطمینان رکھیں۔ (سنن نسائی)

ایک مرتبہ رسول اللہ صلی اللہ علیہ وسلم منبر پر تشریف لائے اور فرمایا : اے لوگو! جو محض زبان سے ایمان لائے اور یہ ایمان دل تک نہیں پہنچا، مسلمانوں کو تکلیف مت دو ،جو اپنے بھائی کی عزت کے درپے ہوگا تو اللہ اس کے درپے ہوگا اور اسے ذلیل کردے گا، خواہ وہ محفوظ جگہ چھپا ہوا ہو۔ (جامع المسانید والمراسیل، رقم: ۶۹۳۷۲)

نبی کریم صلی اللہ علیہ وسلم نے فرمایا دو لعنت کرنے والوں (یعنی اپنے لیے لعنت کا سبب بننے والے دوکاموں) سے بچو، صحابہ نے دریافت کیا یہ دونوں کام کون سے ہیں؟ آپ صلی اللہ علیہ وسلم نے فرمایا : جو راستہ یا وہاں موجود سایہ میں ضرورت سے فارغ ہوتے ہیں۔ (مسلم)

حضرت سہل بن معاذ نے اپنے والد کے حوالے سے بیان کیا کہ ایک غزوہ میں ہم رسول اللہ  صلی اللہ علیہ وسلم کے ساتھ تھے، راستہ میں ایک جگہ پڑاؤ کیا تو لوگوں نے خیمے لگانے میں راستہ کی جگہ تنگ کردی، اور عام گذر گاہ کو بھی نہ چھوڑا، اللہ کے رسول کو اس صورتحال کا پتہ چلا تو آپ  صلی اللہ علیہ وسلم نے ایک اعلان کرنے والا بھیجا، جس نے اعلان کیا کہ جو شخص خیمہ لگانے میں تنگی کرے یا راستہ میں خیمہ لگائے تو اس کا جہاد (قبول) نہیں ہے۔ (ابوداؤد)

ان احادیث کو ذکر کرنے کا مقصد یہی ہے کہ اس عمل کی سنگینی کو اچھی طرح سمجھ لیا جائے اور اس بات پر بھی غور کیا جائے کہ دوسروں کو تکلیف دے کر اور اللہ تعالیٰ کو ناراض کرکے جو روزی کمائی جائے گی اس میں برکت کہاں سے ہوگی؟ اور یہ بات قسم کھا کر کہی جاسکتی ہے کہ جتنا آپ حضرات اتی کرمن کرکے کماتے ہیں اگر اتی کرمن نہ کرتے ہوئے صرف اپنی اصل اور خاصگی جگہ پر تجارت اور کاروبار کریں تب بھی آپ کو ان شاءاللہ اتنی روزی مل کر رہے گی اور اگر خدانخواستہ شروعات میں منجانب اللہ آزمائش کی وجہ سے کچھ کمی بھی ہوئی تو ان شاء اللہ اس میں ضرور ایسی برکت ہوگی کہ آپ کی ضروریات پوری ہوجائیں گی، بس اللہ تعالیٰ کی ذات پر یقین رکھنے کی ضرورت ہے۔ اللہ تعالیٰ نے توبہ اور تلافی کا ایک اور موقع دیا ہے۔ لہٰذا اب باز آجائیں اتی کرمن کرکے دوسروں کو تکلیف دے کر اپنی آخرت برباد کرنے کے ساتھ ساتھ خود اپنی روزی کو بے برکت کرنے کا سبب نہ بنیں۔ اللہ تعالیٰ آپ کا حامی وناصر ہو۔

انتظامیہ سے یہ درخواست ہے کہ وہ صرف توڑ پھوڑ میں دلچسپی نہ لے۔ بلکہ مستقبل میں اس طرح کا اتی کرمن نہ ہو اس کے لیے کوئی ٹھوس منصوبہ بندی کی جائے۔ اس مہم کے بعد بھی مستقل ناجائز قبضہ جات پر نظر رکھی جائے۔ جن سڑکوں پر گٹریں نہیں ہیں وہاں فوری طور پر گٹریں بنوائی جائیں، گٹریں نہ ہونے کی وجہ سے سڑکیں بہت جلد خراب ہوجاتی ہیں، سڑکوں کو مکمل تعمیر کیا جائے، سڑکوں کی دونوں جانب تین تا پانچ فٹ چھوڑ کر سڑکیں تعمیر کی جاتی ہیں تو اس کا سیدھا مطلب یہی لیا جاتا ہے کہ سڑک یہیں تک ہے۔ لہٰذا بقیہ جگہ اتی کرمن کی نذر ہوجاتی ہے۔ سڑکیں چوڑی ہوں تو بجلی کے کھمبوں کو سڑک کے بالکل درمیان میں لگایا جائے یا پھر بالکل کنارے پر لگایا جائے، کھمبوں کو سڑک کے بالکل کنارے نہ لگاتے ہوئے کچھ آگے لگانے کی صورت میں یہ کھمبے بھی اتی کرمن میں معاون بنتے ہیں اور کھمبوں تک اتی کرمن کرنے کو اپنا حق سمجھا جاتا ہے۔ لہٰذا ان تمام باتوں پر توجہ دے کر اس پر عمل کیا جائے تب ہی اتی کرمن مخالف مہم کامیاب اور فائدہ مند ہوسکتی ہے، ورنہ ہر مرتبہ کی طرح اس مرتبہ بھی یہ مہم چار دن کی چاندنی پھر اندھیری رات ثابت ہوگی۔

اللہ تعالیٰ ہم سب کو دوسروں کو تکلیف پہنچانے والے عمل سے بچنے کی توفیق عطا فرمائے اور ہم سب کو ایک دوسرے کے حق میں مفید بنائے اور ہمارے شہر کو اتی کرمن کی وبا سے پاک فرمائے۔ آمین

دوسروں کی طرف سے عمرہ کرنے کا حکم اور اس کا طریقہ

سوال :

محترم مفتی صاحب! کیا دوسروں کی طرف سے عمرہ کرسکتے ہیں؟ اور اس کا طریقہ کیا ہے؟ آسان انداز میں رہنمائی فرمائیں اور عنداللہ ماجور ہوں۔
(المستفتی : محمد حامد، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : عمرہ دوسروں کی طرف سے کرنا درست ہے خواہ وہ زندہ ہوں یا مردہ۔ اور اس کے دو طریقے بیان کیے گئے ہیں۔

پہلا طریقہ یہ ہے کہ جس کی طرف سے عمرہ کرنا ہو احرام باندھتے وقت اس کی طرف سے احرام باندھنے کی نیت کرے، اور تلبیہ بھی اس کی طرف سے پڑھے۔ اس کے بعد بقیہ اعمال معمول کے مطابق انجام دے۔

دوسرے یہ کہ عمرہ اپنی طرف سے ادا کرے اور اس کا ثواب دوسرے کو ہدیہ کردے، یعنی اس طرح نیت کرلے کہ اے اللہ میں نے یہ جو عمرہ کیا ہے یا کروں گا اس کا ثواب فلاں فلاں کو عطا فرما۔ اس صورت میں احرام وتلبیہ میں نیت اپنی ہی کرے گا۔

الْأَصْلُ أَنَّ كُلَّ مَنْ أَتَى بِعِبَادَةٍ مَا،لَهُ جَعْلُ ثَوَابِهَا لِغَيْرِهِ وَإِنْ نَوَاهَا عِنْد الْفِعْلِ لِنَفْسِهِ لِظَاهِرِ الْأَدِلَّةِ.... (قَوْلُهُ بِعِبَادَةٍ مَا) أَيْ سَوَاءٌ كَانَتْ صَلَاةً أَوْ صَوْمًا أَوْ صَدَقَةً أَوْ قِرَاءَةً أَوْ ذِكْرًا أَوْ طَوَافًا أَوْ حَجًّا أَوْ عُمْرَةً، أَوْ غَيْرَ ذَلِكَ مِنْ زِيَارَةِ قُبُورِ الْأَنْبِيَاءِ عَلَيْهِمْ الصَّلَاةُ وَالسَّلَامُ وَالشُّهَدَاءِ وَالْأَوْلِيَاءِ وَالصَّالِحِينَ، وَتَكْفِينِ الْمَوْتَى، وَجَمِيعِ أَنْوَاعِ الْبِرِّ كَمَا فِي الْهِنْدِيَّةِ ط وَقَدَّمْنَا فِي الزَّكَاةِ عَنْ التَّتَارْخَانِيَّة عَنْ الْمُحِيطِ الْأَفْضَلُ لِمَنْ يَتَصَدَّقُ نَفْلًا أَنْ يَنْوِيَ لِجَمِيعِ الْمُؤْمِنِينَ وَالْمُؤْمِنَاتِ لِأَنَّهَا تَصِلُ إلَيْهِمْ وَلَا يَنْقُصُ مِنْ أَجْرِهِ شَيْءٌ..... (قَوْلُهُ لِغَيْرِهِ) أَيْ مِنْ الْأَحْيَاءِ وَالْأَمْوَاتِ بَحْرٌ عَنْ الْبَدَائِعِ. قُلْت: وَشَمَلَ إطْلَاقُ الْغَيْرِ النَّبِيَّ صَلَّى اللَّهُ عَلَيْهِ وَسَلَّمَ وَلَمْ أَرَ مَنْ صَرَّحَ بِذَلِكَ مِنْ أَئِمَّتِنَا، وَفِيهِ نِزَاعٌ طَوِيلٌ لِغَيْرِهِمْ۔ (شامی : ٢/٥٩٥)فقط
واللہ تعالٰی اعلم
محمد عامر عثمانی ملی
21 ذی القعدہ 1443

تنہا نماز پڑھنے والے کی اقتداء کرنے کا حکم

سوال :

مفتی صاحب! اگر کوئی شخص اپنی انفرادی فرض نماز پڑھ رہا ہو تو کیا اُسکے اُوپر ہاتھ کے اشارے سے بتا کر امام مان کر جماعت کی شکل دی جا سکتی ہے؟ جواب عنایت فرمائیں اور عنداللہ ماجور ہوں۔
(المستفتی : عبدالرقيب، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : اگر کوئی شخص تنہا نماز پڑھ رہا ہوتو اس کی اقتداء اس شرط کے ساتھ جائز ہے کہ وہ بھی وہی نماز ادا کررہا ہو جو بعد میں آنے والے کو ادا کرنا ہے۔ لہٰذا صورتِ مسئولہ میں بعد میں آنے والا اسے اشارہ کرکے اس کی اقتداء کرسکتا ہے۔ اور پہلے شخص نے اگر وہیں سے امامت کی نیت کرلی تو جہری نماز یعنی فجر، مغرب اور عشاء میں اس کے لیے جہراً قرأت کرنا ضروری ہوگا۔ اور اگر اس نے امامت کی نہیں تو پھر اس پر جہراً قرأت کرنا ضروری نہیں۔ نیز اس بات کا بھی خیال رکھا جائے کہ یہ نماز مسجد کی شرعی حدود میں پہلی جماعت کی ادائیگی کے بعد نہ ہورہی ہو۔ کیونکہ مسجد کی شرعی حدود میں ایک سے زائد جماعت کرنا مکروہ ہے۔ مزید تفصیلات کے لیے درج ذیل لنک سے جواب ملاحظہ فرمائیں۔

مسجد کے صحن میں جماعتِ ثانیہ کا حکم

ولا يَصِحُّ الِاقْتِداءُ بِإمامٍ إلّا بِنِيَّةٍ وتَصِحُّ الإمامَةُ بِدُونِ نِيَّتِها۔ (الأشباہ والنظائر : ١٨)

ولا یحتاج الإمام في صحۃ الاقتداء بہ إلی نیۃ الإقامۃ حتی لو شرع علی نیۃ الانفراد فاقتدیٰ بہ یجوز۔ (حلبي کبیر : ۲۵۱)

ائْتَمَّ بِهِ بَعْدَ الْفَاتِحَةِ، يَجْهَرُ بِالسُّورَةِ إنْ قَصَدَ الْإِمَامَةَ وَإِلَّا فَلَا يَلْزَمُهُ الْجَهْرُ (فِي الْفَجْرِ وَأُولَى الْعِشَاءَيْنِ أَدَاءً وَقَضَاءً وَجُمُعَةٍ وَعِيدَيْنِ وَتَرَاوِيحَ وَوِتْرٍ بَعْدَهَا)  أَيْ فِي رَمَضَانَ فَقَطْ لِلتَّوَارُثِ۔ (شامی : ١/٥٣٢)فقط
واللہ تعالٰی اعلم
محمد عامر عثمانی ملی
20 ذی القعدہ 1443

مسبوق کی اقتداء کرنے کا حکم

سوال :

مفتی صاحب ! بعد میں آنے والا شخص مکمل ہو چکی جماعت میں آخر کے کسی نمازی کو جو کہ اپنی باقی رکعتیں پوری کر رہا ہو، تو کیا اسے امام مان کر يا بنا کر جماعت کی شکل دی جا سکتی ہے؟
(المستفتی : عبدالرقيب، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : احناف کے یہاں مسبوق یعنی جو پہلے کسی امام کی اقتداء میں اپنی کوئی رکعت ادا کرچکا ہو اور اپنی بقیہ رکعتیں ادا کررہا ہو اس کی اقتداء کرنا جائز نہیں ہے، اس لیے کہ یہ خود سابق امام کا مقتدی ہے۔ لہٰذا حنفی مسلک کے مقلد کو چاہئے کہ یا تو خود امامت کرے یا دیکھ بھال کر ایسے شخص کی اقتداء کرے جو مسبوق نہ ہو، اور وہی نماز پڑھ رہا ہو جو اس حنفی شخص کو پڑھنی ہے۔

عن أبي ہریرۃ قال : قال رسول اللّٰہ صلی اللّٰہ علیہ وسلم: الإمام ضامن۔ (سنن أبي داؤد رقم : ۵۱۷)

الحنفیۃ قالوا : لا یصح الإقتداء بالمسبوق سواء أدرک مع إمامہ رکعۃ أو أقل منہا۔ (الفقہ علی المذاہب الأربعۃ : ١/٣٧٥)

وَحَاصِلُهُ أَنَّ اتِّحَادَ الصَّلَاتَيْنِ شَرْطٌ لِصِحَّةِ الِاقْتِدَاءِ؛ لِأَنَّ الِاقْتِدَاءَ شَرِكَةٌ وَمُوَافَقَةٌ فَلَا يَكُونُ ذَلِكَ إلَّا بِالِاتِّحَادِ وَذَلِكَ بِأَنْ يُمْكِنَهُ الدُّخُولُ فِي صَلَاتِهِ بِنِيَّةِ صَلَاةِ الْإِمَامِ فَتَكُونُ صَلَاةُ الْإِمَامِ مُتَضَمِّنَةً لِصَلَاةِ الْمُقْتَدِي وَهُوَ الْمُرَادُ بِقَوْلِهِ - عَلَيْهِ الصَّلَاةُ وَالسَّلَامُ - ضَامِنٌ أَيْ تَتَضَمَّنُ صَلَاتُهُ صَلَاةَ الْمُقْتَدِي۔ (تبیین الحقائق : ١/١٤٢)فقط
واللہ تعالٰی اعلم
محمد عامر عثمانی ملی
19 ذی القعدہ 1443

سڑکوں پر نماز جنازہ پڑھنے کا حکم اور اس کا طریقہ

سوال :

نماز جنازہ، جنازہ ہال میں پڑھنا ضروری ہے یا کسی دوسری جگہ مثلاً سڑکوں پر بھی نماز جنازہ ادا کرسکتے ہیں؟ مکمل رہنمائی فرمائیں۔
(المستفتی : محمد عمران، مالیگاؤں)
----------------------------------------
بسم اللہ الرحمن الرحیم
الجواب وباللہ التوفيق : نماز جنازہ، جنازہ ہال میں پڑھنا ضروری نہیں، بلکہ ہر پاک جگہ نماز جنازہ ادا کی جاسکتی ہے۔ لہٰذا گلی محلہ کی سڑکوں پر اگر بظاہر کوئی نجاست نظر نہ آرہی ہوتو یہاں بھی نماز جنازہ ادا کی جاسکتی ہے۔

سڑکوں اور راستوں کی پاکی اور ناپاکی کے سلسلے میں یہ ضابطہ معلوم ہونا چاہیے کہ اگر ان پر کوئی نجاست لگ جائے اور وہ خشک ہوجائے، نیز اس کا اثر یعنی اس کا رنگ و بو جاتا رہے تو زمین پاک سمجھی جائے گی اور اس پر نماز پڑھنا درست ہوگا۔

تاہم سڑکوں پر نماز جنازہ پڑھنے کا بہتر طریقہ یہ ہے کہ جوتا، چپل پیروں سے اتار کر جوتے، چپل کے اوپر کے حصہ پر پیر رکھ کر نماز جنازہ پڑھی جائے۔ ایسی صورت میں اگر زمین یا جوتے، چپل میں بھی ناپاکی لگی ہوئی ہوگی تب بھی نماز کے صحیح ہونے میں شکوک و شبہات باقی نہیں رہیں گے، اس لئے کہ ایسے جوتے، چپل پہن کر نماز پڑھنے سے نماز نہیں ہوتی جن کے نیچے ناپاکی لگی ہوتی ہے، لیکن اس طرح ناپاکی لگے ہوئے جوتے، چپل کو پیروں سے اتار کر پھر اس کے اوپر کا حصہ جو پاک ہے اس پر پیر رکھ کر نماز جنازہ پڑھنے سے نماز درست ہوجاتی ہے۔

عَنْ عَبْدِ اللَّهِ بْنِ عُمَرَ قَالَ : كُنْتُ أَبِيتُ فِي الْمَسْجِدِ فِي عَهْدِ رَسُولِ اللَّهِ صَلَّى اللَّهُ عَلَيْهِ وَسَلَّمَ، وَكُنْتُ فَتًى شَابًّا عَزَبًا، وَكَانَتِ الْكِلَابُ تَبُولُ وَتُقْبِلُ وَتُدْبِرُ فِي الْمَسْجِدِ، فَلَمْ يَكُونُوا يَرُشُّونَ شَيْئًا مِنْ ذَلِكَ۔ (سنن ابی داؤد، رقم : ٣٨٢)

وَلَوْ أَصَابَتْ النَّجَاسَةُ الْأَرْضَ فَجَفَّتْ وَذَهَبَ أَثَرُهَا تَجُوزُ الصَّلَاةُ عَلَيْهَا عِنْدَنَا۔ (بدائع الصنائع : ١/٨٥)

وَفِي الْفَيْضِ : طِينُ الشَّوَارِعِ عَفْوٌ وَإِنْ مَلَأَ الثَّوْبَ لِلضَّرُورَةِ وَلَوْ مُخْتَلِطًا بِالْعَذِرَاتِ وَتَجُوزُ الصَّلَاةُ مَعَهُ۔ (شامی : ١/٣٢٤)

وَلَوْ قَامَ عَلَى النَّجَاسَةِ وَفِي رِجْلَيْهِ نَعْلَانِ أَوْ جَوْرَبَانِ لَمْ تَجُزْ صَلَاتُهُ؛ لِأَنَّهُ قَامَ عَلَى مَكَان نَجِسٍ وَلَوْ افْتَرَشَ نَعْلَيْهِ وَقَامَ عَلَيْهِمَا جَازَتْ الصَّلَاةُ بِمَنْزِلَةِ مَا لَوْ بَسَطَ الثَّوْبَ الطَّاهِرَ عَلَى الْأَرْضِ النَّجِسَةِ وَصَلَّى عَلَيْهِ جَازَ۔ (البحر الرائق : ١/٢٨٢)فقط
واللہ تعالٰی اعلم
محمد عامر عثمانی ملی
19 ذی القعدہ 1443