آخر علماء کریں، تو کریں کیا؟

✍️ مفتی محمد عامر عثمانی ملی 

    (امام وخطیب مسجدکوہِ نور )

قارئین کرام ! شہری حالات کا علم رکھنے والے ہر شخص کو اس بات کا بخوبی علم ہے کہ شہر عزیز مالیگاؤں میں دن بدن نئی نئی برائیاں بڑھتی جارہی ہیں، اور ان برائیوں کو روکنے کی ذمہ داری تو ویسے ہر شخص کی ہے، یہ کام صرف علماء کرام کے کرنے کا نہیں ہے۔ لیکن شہر کے چند علماء کرام جن میں سرفہرست حضرت مولانا محمد عمرین صاحب محفوظ رحمانی (سیکرٹری آل انڈیا مسلم پرسنل لاء بورڈ) ہیں اور ان کے رفقاء نوجوان علماء کرام ہیں جو ہر منکرات اور برائیوں پر لکھتے اور بولتے ہیں، اور وقت پڑتا ہے تو ان کے ساتھ آگے بڑھ کر بھی کچھ کرنے کی کوشش کرتے ہیں۔

فی الحال ایک بیوٹی اکیڈمی معاملے میں انہیں علماء کرام نے براہ راست اکیڈمی پہنچ کر اصلاح کی کوشش کی، جس کی شہریان کی طرف سے بڑی سراہنا کی گئی اور ان شاءاللہ اس کے مثبت نتائج سامنے آئیں گے۔ لیکن ایک بیماری جو شہر میں چند سالوں سے عام ہوتی جارہی ہے کہ جہاں علماء کرام نے کسی برائی پر نکیر کی تو کوئی بھی ایرا غیرا اٹھتا ہے اور بے سوچے سمجھے سوشل میڈیا پر لکھ دیتا ہے کہ آپ کو فلاں کی فلاں برائی کیوں نہیں دکھتی؟ آپ نے فلاں فلاں کے بارے میں کیوں کچھ نہیں کہا؟ ایسے افراد سے ہمارا سوال ہے کہ جو وہ کسی بھی جید عالمِ دین جس پر انہیں اعتماد ہو ان سے دریافت کرلیں کہ اگر کوئی عالم ایک برائی پر لکھے تو کیا اس پر تمام برائیوں پر لکھنا ضروری ہوجاتا ہے؟ مطلب یہ کہ کوئی عالم لکھے، بولے اور عملی قدم اٹھائے تو ہر ہر برائی پر کرے ورنہ کچھ نہ کرے؟ اس کا صاف مطلب ہے کہ یہ فتنہ پرور عناصر چاہتے ہیں کہ شہر میں جو کچھ بھی غلط سلط ہورہا ہے اسے ہونے دیا جائے، اسے روکنے ٹوکنے کی ضرورت نہیں ہے۔ 

کل ایک لاوارث تحریر بنام "کمزور شریعت" کئی گروپ میں دیکھنے کو ملی جس میں یہی سب کچھ کہا گیا ہے اور اس میں اس شقی اور بدبخت نے گالیاں بھی لکھ دی ہے۔ اس میں یہ بھی لکھا گیا ہے کہ مولانا عمرین صاحب کی فائل بنائی جاچکی ہے اور ناگپور میں ان کی چرچا ہے، مجھ حقیر سے بھی کچھ دن پہلے کہا جاچکا ہے کہ آپ کی شکایت اوپر تک کی جاچکی ہے، اس لیے آپ ذرا ان سب کاموں سے دور رہو۔ میں نے صاف کہہ دیا تھا کہ ہم دین و شریعت کی بات کرتے ہیں، اس سلسلے میں کوئی غیرقانونی کام ہم نے نہ کیا ہے اور نہ کریں گے۔ ان شاءاللہ ۔ تو کسی سے خائف ہونے کی ضرورت ہی نہیں ہے۔ یعنی ہمیں فرقہ پرستوں سے بھی ڈرانے کی ناکام کوشش کی جارہی ہے۔

ایسے حالات میں آخر علماء کرام کریں، تو کریں کیا؟ بولنا بھی مصیبت بن رہا ہے اور نہ بولنے میں شہر اور شہریان کے برائیوں میں مبتلا ہونے اور بے راہ روی کے حد سے زیادہ بڑھ جانے کا اندیشہ ہے جو سب کے لیے دنیا وآخرت میں وبال بنے گا۔ گھریلو ذمہ داریاں، مسجد، مدرسہ، مطالعہ اور علمی مشغولیات کے بعد اگر وقت نکال کر علماء کچھ کررہے ہیں تو ان کے لیے تقویت کا سبب بننا چاہیے نا کہ ان کی حوصلہ شکنی کا۔ اب علماء کرام اپنا گھر بار چھوڑ کر سارے غلط سلط کام جو انفرادی طور پر بھی ہورہے ہیں ان سے لڑنے بھڑنے کے لیے نکل جائیں؟ اور آپ بس سوشل میڈیا پر بیٹھ کر علماء کرام کو بتاتے رہو کہ یہ کرو وہ کرو ؟ آپ کس مرض کی دوا ہیں صاحب؟ آپ کو کس نے روکا ہے کہ آپ اصلاح کا کام نہیں کرسکتے؟ آپ کو جب اتنی ساری معلومات ہیں کہ شہر میں یہ غلط کام ہورہا ہے وہ غلط کام ہورہا ہے تو شرعاً آپ کی بھی ذمہ داری ہے کہ آپ بھی اسے ہاتھ یا زبان وقلم سے روکنے کی کوشش کریں، ورنہ آپ بھی برائیوں کو نہ روکنے کے ساتھ ساتھ مصلحین کی حوصلہ شکنی کے بھی گناہ گار ہوں گے۔

ہمیں معلوم ہے کہ ایسے فتنہ پرور لوگ کچھ نہ کچھ مقدار میں ہمیشہ رہیں گے، لیکن جیسے ہی ان فتنہ پروروں کی فتنہ انگیز تحریریں کسی گروپ میں نظر آئے تو اس گروپ میں شامل تمام افراد کی ذمہ داری ہے کہ اس کی مخالفت کریں، خاموش بالکل نہ رہیں، آپ کی خاموشی ایسوں کی ہمت کو بڑھانے اور علماء ومصلحین کے حوصلوں کو توڑنے کا سبب بنے گی۔ اسے ارسال کرنے والے شخص کے خلاف کارروائی کرکے اسے گروپ سے نکلوائیں، ایسی تحریروں کو ڈیلیٹ کروائیں، تاکہ آئندہ کوئی بھی علماء کرام اور اصلاح کرنے والوں کی حوصلہ شکنی سے پہلے سو بار سوچے۔

اور کمنٹ باکس میں ضرور بتائیں کہ ایسے فتنہ پروروں کے خلاف اور کون سا قدم اٹھایا جاسکتا ہے؟

اللہ تعالیٰ ہم سب کو خود تمام برائیوں سے بچنے اور حتی الامکان دوسروں کو روکنے کی توفیق عطا فرمائے۔ آمین