سوال :
کیا حضرت مریم اللہ کے نبی کی پہلی بیوی ہیں؟ یعنی آپ ﷺ کی بیوی بننے کا شرف روز آخرت میں حاصل ہوگا؟ کیا اس طرح کی کوئی روایت ملتی ہے؟ رہنمائی فرمائیں۔
(المستفتی : لئیق احمد، مالیگاؤں)
------------------------------------------
بسم اللہ الرحمن الرحیم
الجواب وباللہ التوفيق : حضرت مریم نبی کریم صلی اللہ علیہ و سلم کی پہلی بیوی ہیں، ایسا کسی روایت میں نہیں ملتا، لہٰذا یہ بات بیان نہیں کرنا چاہیے۔
البتہ بعض روایات میں آتا ہے کہ نبی کریم صلی اللہ علیہ وسلم کی ازواجِ مطہرات کے علاوہ حضرت مریم بنت عمران والدہ حضرت عیسی علیہ السلام، حضرت کلثوم اختِ موسی علیہ السلام، اور فرعون کی اہلیہ حضرت آسیہ جنت میں آپ صلی اللہ علیہ و سلم کے نکاح میں ہوں گی۔
لیکن یہ تمام روایات سند کے اعتبار سے ضعیف ہیں جیسا کہ علامہ ابن کثیر رحمہ اللہ نے البدایہ والنھایہ میں لکھا ہے بلکہ اس میں بعض کو موضوع (من گھڑت) تک کہا ہے۔ لہٰذا احتیاط اسی میں ہے کہ یہ بات بیان نہ کی جائی، کیونکہ اس کا تعلق اعمال کی درستگی یا عقائد سے نہیں ہے۔ یا اگر بیان کیا جائے تو ان روایات کا ضعیف اور کمزور ہونا بھی بیان کیا جائے۔
عن ابي أمامة قال : سمعت رسول الله صلي عليه وسلم يقول لعائشة : أشعرت أن الله عز و جل زوجني في الجنة مريم بنت عمران، و كلثوم أخت موسي، و امرأة فرعون۔ (المعجم الكبير للطبراني، رقم : ٨٠٠٦)
ولکن ہذا السیاق بہذہ الزیادات غریب جدا، وکل من ہذہ الأحادیث في أسانیدہا نظر -قولہ- عن عبادۃ بن الصامت عن النبي ﷺ بمثلہ، وہذا منکر من ہذا الوجہ بل ہو موضوعؒ، رواہ أبو زرعۃ الحدیث۔ (البدایۃ والنہایۃ، باب ذکر جماعۃ من أنبیاء بني إسرائیل، قصۃ عیسی بن مریم الخ، ۲/ ۶۲)فقط
واللہ تعالٰی اعلم
محمد عامر عثمانی ملی
13 محرم الحرام 1443
کوئی تبصرے نہیں:
ایک تبصرہ شائع کریں